Norgga antropologa Helge Kleivan vuođđodii 1968is IWGIA organisašuvnna. Das rájes lea IWGIA čuvvon álgoálbmogiid lihkastagaid ja viiddidan álgoálbmogiid doaimmaid ja fierpmádagaid miehtá máilmmi.

IWGIA čállingoddi lea Københápmanis, ja lea riikkaidgaskasaš sorjjasmeahttun miellahttuorganisašuvdna mii doarju álgoálbmogiid miehtá máilmmi iešmearridame rahčamušain.

Organisašuvnna váldodoaimmat leat olmmošvuoigatvuođabarggut, dutkamat, dokumentašuvdna ja diehtojuohkin, ja maiddái prošeaktabarggut ovttas eará álgoálbmogiiguin ja organisašuvnnaiguin.

IWGIA lea maiddái vuođđodan máilmmiviidosaš fierpmádaga mas oasálastet dutkkit ja olmmošvuoigatvuođa berošteaddjit ja lea maid lagaš oktasašbargu guovddáš ON`a institušuvnnaiguin.

Organisašuvnnas leat maid báikkálaš joavkkut Danmárkkus, Ruoŧtas, Sveitsas ja Frankriikkas. Lea maid áigumuš ásahit báikkálaš joavkku Barcelonai Spaniai.

IWGIA Oslo lea International Work Group for Indigenous Affairs báikkalaš joavku Norggas mas leat sihke aktivvalaš ja pasiivválaš miellahttut, ja mii bargat orginisašuvnna vuođđoduvvon árvvuid vuođul. Mis leat guhkes árbevierru bargat ovttas Oslo Universitetain ja Sosialantropologia Instituhttain.

Min doaimmat sisttisdollet earret eará diehtojuohkin olmmošvuoigatvuođabarggu birra ja gáldduid birra. Lea maid luoikkahanbálvalus min girjerádjosis, ja sáhttit maid buktit rávvagiid ee. čállosiidda artihkkaliidda, ságastallamiidda, logaldallamiidda, filbma čájáhallamiidda, ja govvačájáhusaid ja eará prošeavttaid oktavuođas . Jus plánet čállit barggu álgoálbmogiid birra, de IWGIA ja IWGIA Oslo sáhtta du veahkehit informašuvnnain.

IWGIA juogada kántuvrra UiO Prográmmalávdegottiin, Servvodatvitenskahpa Fakultehtain, Eilert Sundts hus 2 gearddis, latnja B243, Moltke Moes geaidnu 31.

Min adreassa lea: IWGIA Oslo, Sosialantropologisk Institutt, Pb 1091, Blindern, 0317 Oslo